C.Ronaldo Thar Joao Felix In Europe League Ah Record Thar Ropi A Tuah




C.Ronaldo thar ti ih hmin an phuahmi Portugal tleirawl Joao Felix khal kum 19 te lawng a silai nan,a club Benfica hrang lehnak hmun co ringring in a lek tha ringring thei.

Europe league quarter final puai hmaisa sawn ah Benfica in German club Frantfurk an rak mikhual ih Felix sit goal mi goal 3 thawn 4-2 in an rak neh.Benfica hrang hat trick tuahtu Felix cu kum 19 te lawng a silai ruangah Europe league thuanthu ah kum nauhakbik ih hat trick tuahthei record thar a tuah.

Felix cun minute 21nak ah penalty thawn Benfica hrang goal hmaihruai a thun ih minute 43nak ah Cervi Bawhlung pekmi cu penalty rin leng ihsin Benfica hrang mawi zetin a sit goal.Goal 3nak cu minute 54nak ah Grimaldo ih Bawhlung tuahmi cu veikhat ah a rak sit goal hngal.

Felix hi alai hmaitlan ih dung le vingtlan hmun 2 pawl ih lek thei a si ih hmaitlan dinhmun ah hmun 3 ih lek thei a si.

Real Madrid le Man United in an duh hleice cuang ih Juventus khal in an duh ve.Tuah khawitawk a lut ding ti a fiang hrih lo ih Benfica a suahsan caan ahcun a man a tamzet ve ding a si.