C.Ronaldo Tel Rori Seh – Ajax Coach Erik Hag




April ni 11 ,nili zing Myanmar 1:30 am ah Champions league quarter final hrang Ajax in Juventus an rak mikhual dingih Juventus cu mikim zet si thei sehla a duh thu Ajax Coach Erik Hag in a rel.

Ajax Coach Hag cun ,”C.Ronaldo a lek thei asile ,thiltha tuk rori a si ding.Ziangahtile kan domi player an kim theh cu kan duhmi a si.Curuangah Juventus hrang C.Ronaldo a tel thei a si ahcun kan lungkim tuk lawlaw ding.

“Tunaite Champions league ah Netherlands club pawl an thlengsang thei dah lo nan,tui dinhmun kan thleng thei cu kan diriam ngaingai ih sumpai ruangah thil ziangkim hi a thlengdanglam aw cak tuk rori.Curuangah kan caantha kaihnget in kekar vivo kan tum ih kan fimkhur zet ding.

“Champions league zuamawknak ah team tha lawnglawng an um ih kum tinten a keel ringring a si ahcun mipi khal in an ning ding.Curuangah tui season hrang Ajax le Porto in quarter final kan thleng thei cu mipi ti mangbangtu le tiphurtu pakhat a si,” a ti.

C.Ronaldo hi damlonak ruangah Serie A puai 2 lai a lek lo zo nan,Ajax dotu ding Juventus hmin cazin ah a tel zo ih a luh hngal khal zum zet a si.