C.Ronaldo Kiltu Ding Kan Ret Lo Ding – Ajax Coach Ten Hag




Tuizan Champions leauge quarter final puai neta sawn hrang Juventus dotu ding Ajax Coach Ten Hag cun Juventus hmaitlan C.Ronaldo cu a hleice ih kil a tum lo thu a rel ih result mawizet hmuh a tum.

Ajax le Juventus hi Ajax innpi ah veikhat an rak do aw zo ih 1-1 in an rak duhtawk aw.Tui tum an puai ah goal a lutlo asile ,Juvnetus tin semi final an lut ding.Goal a lut asile goal tamsawn lole khualkhua goal nei tamsawn cu semi final hrang an tling ding.

Ten Hag cun ,”Kanmai Innpi ih 1-1 a si hnu cun Juventus cu semi final lut dingih zum sawnmi an si.Asinan,Turin ah sit goal tengteng kan tum dingih nasa zetin kan zuam ding.Culawng siloin kan lek that ahcun kan sit goal thei tuk timi khal kan theifiang zet.

“Juventus hi Real Madrid thawn tahthim theih an si lo ih anmah ten lehdan danglam an nei ve.Hmaisa sawn kan lek hlan ihsin kan rak zirsuak zo ih lehdan danglam nei an si timi cu kan thei cia.Kan puai hmaisa sawn ah nehsawh zetin kan lehpi nan,sit goal thei loin kan rak buai.

“Tui tum kan puai hrang Juventus coach Allegri in a dungkham pawl nasa zetih a remthat hleice cuang ka zum zet.Asinan, sit goal tengteng tum in tan kan suah thotho ding.Europe zuamawknak ih kan damlai cu manhla kan tituk ih Real Madrid rori dawisuak khal ropi kan tituk.Asinan,tui dinhmun ih duhtawk men kan tum lo,theihhngilh thei lo khop ih hminsin neih vivo kan duh a si.

“C.Ronaldo thuhla ahcun amah kiltu ding rori minung ret ka tum lo ih mi pakhat kiltu dingin minung ka rak rem dah lo hrimhrim.Rinsanawknak hnget kan nei sinsin ih sangsawn dinhmun hrang nasa zetin kan zuam ding a si,” a ti.