C.Ronaldo Kan Nei Cu Mi Vantha Kan Si – Allegri




Juventus Coach Allegri cun Juventus in C.Ronaldo an neih cu mi vantha an si thu a rel ih C.Ronaldo ruangah tutiang champions league ah kan dam phah tiin a ti.

C.Ronaldo hi Real Madrid suahsan ih Juventus pantu a si ih a club thar hrang a lek thazet.Serie A ah goal 19 a thun zo ih Champions league khalah goal 5 a thun thei zo.Juventus in Champions league quarter final an luh theinak khalah C.Ronaldo a thupi zetih Atletico Madrid lamah hat trick thun ih Juventus nehnak a rak copi.

Allegri cun ,”C.Ronaldo hi thiamnak hleice neitu a si ih Bawhlung kan lek tikah danglamnak thlentu a si.Tuah tla cun a dam thatuk zo ih kan dung zarh aiin a mithmai a pan tuk zo.Atletico Madrid thawn kan puai ah goal 3 in thunsak zo ih Ajax thawn kan puai khalah goal 1 in thunsak bet.Curuangah kan team ih C.Ronaldo kan neih cu kan vantha tuk rori a si,” a ti.

Juventus cun €100m thawn Real Madrid ihsin C.Ronado an rak lei ih mi tampi relsiat rero an sinan,tuahcun an hmang tangkai zet a si.