C.Ronaldo Hi Penalty Kulsung Ahcun Sahrang Vek A Si – De Ligt




Ajax Captain De Ligt cun Juventus hmaitlan C.Ronaldo cu penalty kulhsung ahcun Sahrang vekih mi siatsuah hmang a si tiin a rel ih a cakvak zamrang thu khal a rel.

Champions league quarter final puai hmaisa sawn hrangah Ajax in Juventus an rak mikhual ih goal 1 veve in an duhtawk aw.Juventus hrang C.Ronaldo in a sawh goal ih Ajax hrang Nerez in a sit goal ve.

De Ligt cun ,”C.Ronaldo hi player thazet si ih penalty kulhsung ahtla cun sahrang bangih mi siatsuah hmang a si.Penalty kulhsung ih remcang tha a hmu hnuhnu cun ziangvek ih cepther a si khalle zamrang zetin a sit goal man ringring.Player pahnih karlak khalih tlansuak vohvoh thei a si.

“Juventus dungkham thatzia kan theifiang zetih pahtlang harsa zet an si.Vei tampi kan zuam nasa nan,an karlak te ih luh tlang vivo ding cu a ol lo.Asinan ,kan lek tha zet tiin ka ruat.Player hmailam eng zetzet kan nei tamih nasa zetin kan tangkhawm thiam.Tui tum ih fiang zet cu Ajax hi vanthatnak men ruangih Champions league quarter final lut fang kan si lo timi a si.

“Juventus hi team thazet an si bangin anmai innpi ahcun do an harsa zet ding tikhal kan thei,Asinan nasa zetin kan zuam tlang ding a si,” a ti.