C.Ronaldo Fehsan Ih Record Thar Tuahtu Leo Messi




Laliga round 30nak ih Barcelona hrang free kick thawn goal mawizet thuntu Leo Messi cun Europe top 5 league hrangah a rualpa C.Ronaldo fehsan in record thar a tuah.

Laliga round 30nak ih Villarreal le Barcelona puai ah Messi cu lut hngal loin thelhbawh ah a toter lawk nan,minute 62nak ah Coutinho thlengin a lutih minute 90nak ah free kick thawn Barcelona hrang goal mawizet a thun.Hitin Messi cu Laliga ah goal 415 a thunkim thangih Europe top 5 league thuanthu ah sit goal tambik hminsin thar a tuah.

Himi hi Europe top 5 league hrangih an sit goal mi vial a si ih league tenau ih an sit goal mi pom a si lo.C.Ronaldo in Europe top 5 league hrang goal 414 a thun zo ih Man United thawn premier league ah goal 84,Real Madrid thawn Laliga ah goal 311 le Juventus thawn Serie A ah goal 19 pawl an si.

Barcelona captain Leo Messi hi tui season khalah a lek tha zetih zuamawknak tinkim ah puai 39 lek zo in goal 42 a thun zo.Tui season Europa top 5 league sungah sit goal tambik a si sui boot hrang a dinhmun a tha sinsin.Laliga ah puai 28 lek zo in goal 32 a thun thei ih Champions league ah puai 6 lek zo in goal 8 a thun thei.Copa del rey ah puai 4 a lek zo ih goal 2 a thun thei a si.