C.Ronaldo A Thazet Ko Nan,Messi A Cungcuang Hleice -Capello




Milan , Real Madrid , Roma , Juventus , England le Russia pawl rak kaihruai zotu Coach Capello cun bawhlung leitlun ih mi ropi pahnih Leo Messi le C.Ronaldo thuhla a rel ve ih C.Ronaldo aiin Messi a retsang sawn.

Capello hi Real Madrid coach tum 2 rori a tuan zo nan,Real Madrid ih C.Ronaldo a luh hlan a si bangin C.Ronaldo thawn an umtlang man lo veve.

Capello cun “C.Ronaldo hi bawhlung sit thiamzet mak tara a sinan,Messi cu suahpi thiamnak nei ih mi hleice cuang a si.Bawhlung leitlun ah mi ropi hleice cuang timi pathum ka nei ih Pele ,Maradona le Messi pawl an si.C.Ronaldo hi a cakvak zetih amah thawn cun nehnak co khal a ol zet.Asinan,Messi cu suahpi thiamnak nei a si ih a cungcuang hleice.

“Messi kum 16 hrawng a silai ah ka rak tong zo ih mangbang in ka rak um.Ziangtile suahpi thiamnak nei a si bangin tuisun vekih a tuahmi cu a rak tuah rero zo.Midang zokhal ih tuah thei lomi a tuah thei ih a cungcuang hleice.C.Ronaldo khal champion pakhat si dingin a tuah aw ko nan,suahpi thiamnak a neih lo bangin mi cungcuang hleice a si lo,” a ti.

Tuah Capello hi bawhlung coach a tuan nawn lo ih Bawhlung coach ihsin a colhfel zo thu cu 2018 kum ah a rak phuang zo a si.