Bualrawn Hmin Ah Cr7




Portugal club Sporting Lisbon cun an club thuanthu ih player ropi zet pakhat C.Ronaldo sunloihnak ah tiin an Bualrawnpi hmin cu CR7 ti ih thleng an tum ih thleng dingin timtuahnak an nei rero.

Bualrawn hmin ah ‘CR7’ ti lole ‘Alvalade CR7’ ti tum a si ih club hruaitu pawl cu Bualrawn hmin thleng ding thu ah an lungkim tlang theh zo.Tuah C.Ronaldo ih palai le sungte pawl an be rero ih amah C.Ronaldo khal an thiltuah tummi cu theihternak an nei zo.

CR7 timi hi sumtuahnak pakhat hmin hrangih ding zo a si ih CR7 timi thawn thil phunphun an rak suah rero zo.Sporting Lisbon in an Bualrawnpi cu CR7 ti ih hmin an thleng thei asile CR7 pawlkom hnenih hlawhnak an tel ve ding.CR7 timi cu C.Ronaldo duhkawh hmin a si ih amai kaihruainak thawn pawlkom lole comapany dinmi a si.

Tuah thu felfai zianghman a um hrih lo nan,Sporting Lisbon hruaitu pawl cun a rangthei bik ih thu felfai than lohli ding thu an tarlang.

C.Ronaldo hi Portugal club Sporting Lisbon ihsin lar thok a si ih kum 18 a kim ah Premier league club Man United in an rak lei.Man United hrang tha zetih a lek hnu ah Spain club tha Real Madrid in an lei ve.Tuah Real Madrid a suahsan fel zo ih Italy club Juventus hrang a lek rero lai a si.