Barcelona In Khualkhua Ah Man United An Neh




Champions League quarter final puai hmaisa sawn hrang Man United in barcelona an rak mikhual ih 0-1 thawn mikhual Barcelona in nehnak an co.

Man United XI ( 4-3-3 ) : De Gea ,Young ,Smalling ,Lindelop,Shaw ,Fred ,McTominay,Pogba ,Dalot ,Lukaku ,Rashford. Thelhbawh : Romero ,Jones ,Rojo,Mata,Lingard ,Pereira.

Barcelona XI (4-3-3 ) : Stegen ,Semedo ,Pique ,Lenglet,Alba, Arthur ,Busquets ,Rakitic ,Coutinho ,Suarez ,Messi.Thelhbawh :Cillessen ,Umtiti ,Roberto ,Alena,Vidal ,Dembele,Malcon.

FT: Man United 0-1 Barcelona
Shaw 12′

Puai an thok ih mikhual Barcelona sawn in Bawhlung cotam sawn in an nawr. Minute 12nak ah Messi ih Bawhlung tuahmi cu Suarez in a rak sawh ih Shaw in an lamah a ti goal ngah pangih Barcelona in goal an nei.Barcelona in an nawr peh zet nan, remcang tha an tuah aw thei lo in an um ih Man United nor thutthi khal tih a nung hrih lo.Minute 28nak ah Smalling cun a ngiar rero mi Messi a namtlu ih Messi hnar in thi a suak tamzet,Referee in fawl a lak lo bangin McTominay cu penalty kulhsung ah Pique in a titlu nan,fawl a la cuang lo.Man United in an nawr peh rero nan,remcang tha tuah aw thei loin an um ih Barcelona sawn in minute 35nak ah remcang thazet an nei,Suarez in Bawhlung a ham rero laiah Coutinho in khawl a rawn sut zukzi cu De Gea in a rak kham man fangfang. Inntek in sit goal tum in an nawr ve nasa nan,Dalot in remcang thazet a neihmi cu khawlsung ah lusawh loin lengah a sawh suak ih goal dang lut bet hrih loin colh an hmang.

Caan hrek neta sawn an thok cu an puai a sosang zet thlangih Barcelona in Bawhlung cotam sawn in an nawr tuk thei nawn lo.Inntek in Bawhlung cuh vohvoh in an nawr nan, remcang tha an tuah aw thei lo thung.Inntek in nasa zetin an nawr nan,khawl tihnung an nei thei lo ih mikhual sawn in anmai lehdan keelten an nawr sal.Minute 64nak ah Suarez in remcang thazet a nei nan,De Gea vial umnak ah khawl thelh.Mikhual in Bawhlung an pe aw kual rero men ih khawl tihnung nei thei loin reizet an um.Caan cem naih cun Inntek in nasa zetin an nawr ih Smalling in khawl kiangte ah bawhlung thazet a nei nan,khawl tlunah a sit.Cutin goal dang a lut nawn lo ih khualkhua ah 0-1 thawn Barcelona in nehnak an co.

April ni 17 ah avei 2nak hrang an sit dingih result komkhawm a si ding.Goal nei tamsawn lole away goal nei tam sawn in semi final an lut ding.Tui dinhmun ahcun khualkhua ih goal nei Barcelona dinhmun a thasawn hrih a si.