Aung La Ih Taikhap Tlun Ka Tum – Bradon Vera




One championship Greatness Unleashed hrangih Aung La ngiartu Brandon Vera cu hmaiton thusuhnak neih a si ih Aung La thawn bangawknak tampi an neih thu a rel tlunah ngiartu a si bangin taikhap tlun rori a tum thu khal a rel.

Mi tampi theithiam hrih lo kan um in a langih mallai kan relfiang ta ding.Vera le Aung La sual awk ding hi Heavyweight siloin Light Heavyweight sawn a si dingih Vera in Aung La kol laimi Light Heavyweight champion taikhap a cuh ding.Brandon Vera hi Heavyweight champion a si ih a ti zan awk (rihnak tla niamter) a tul.Aung La hi Middleweight le Light Heavyweight champion a si ih Light Heavyweight hrang a ti rit awk a tul ve.

An sual awk hlanpi ah an rihnak zohfel a si dingih Light Heavyweight hrang an tling lo asile, an sual aw thei lo ding.Curuangah annih pahnih sual aw ding khal an rihnak zohfel hnu lawngah a fiang taktak ding tinak a si.Asinan,a tlangpi thu in mai rihlonak hmun lo ih sual aw timi cu MMA leitlun ah a tam zet zo ih puai a thlen hlanah an ti rit aw lole zang aw man ringring theu.

Brandon Vera hi pi 6 le zungpi 3 ih sang a si ih 113 kg a rit.Philippines mi a sinan,Aung La bangin US ih thanglian le ceeng a si.MMA leitlun ah mi 23 a rak sual zo ih vei 16 nehnak co in vei 7 a sung.

Aung La hi pi 6 le zungpi 1 ihsang a si ih 83.9 kg a rit.MMA leitlun ah mi 34 a sual zo ih vei 24 nehnak co in vei 10 a sung zo.

One Championship ih Light Heavyweight rihdan cu 84 kg ihsin 102 kg tiang a si.

Brandon Vera cun “Kulhsung rori ih Aung La va ngiar ding kha nasa zetin ka ruat aw nasa ve.Asinan,Sualawknak hmunpi ka thlen tikah mipi thawmvang a nasa tuk ih phurnak in pek sinsin ruangah ka duhdan bangin ka ngiar thei.Thinlung thiangte ka ngiarmi a si ih mawi lo tuk ih cangvaih ciamco ka tum hrimhrim lo.

“Aung La hi ka aiih naute sawn a sinan, mipa diktak rori thinlung pu in a cangvai ih mipi thinlung khal a nehtuk.Kulhsung ih a misual dan khal ka uar zetih rihnak hmun 2 rori ah a champion thei.Curuangah ti zaang aw tahrat ih ka amah sual ka duhnak pakhat a si.

“Aung La ih misual dan thu ahcun relthiam a har ngaingai. Ziangahtile,amah zirhtu pawl cu keimah thawn tuantlang rero zo an si ih kan zirmi le kan lehdan a bang aw zet tiin ka ruat.Ka pahnih karlak ih danglamnak bik cu kan tontehmi a si.Tlawng pakhat ah kan zirsuak veve ih zirhtu hmunkhat a si tikah bangawknak tampi cu kan nei.

“Taikhap pahnih kol ka duh ve ih ngiartu sawn ka si bangin Aung La hnen ihsin Light Heavyweight champion taikhap lak ding cu ka tum bikmi a si,” a ti.

An thulhsal lole October ni 13 ih sual aw ding Vera le Aung La cu an rihnak kaiso dingin le tumsuk dingin an zuam thok rero zo a si.