AMERICAN IN SYRIA A NUAI CIAMCO

0
138

Syria ram ni suahnak Upharitis tipi kaptluan ih Cozah lam tang ralkap tawkfang nawn kan that ngah a si tiah American cun an phuang.Syria Cozah cun American cun mi tamtuk a burbur rori in a that a si tiah thinheng zet in an sim.American cun an somdawl mi ralkap pawl cun anmah le mah khamawknak ah tan an lasal ih cui doawknak ah Syria lamtang Ralkap tamtuk thimi a si tiah an phuan mi a si.

Syria ih Democratic Pawlkom(SDF)pawl cun Cozah lamtang pawl ih donak le nornak cu mizan ah natuk in an tuar ih mah le mah khamawknak in an dosal mi a si ih American khal cun bomnak a pekve mi a si tiah Syria ram ih American ralkbawi Colonel pakhat cun a sim.Syria lamtang ralkap 500 hrawng cun ramri lan lo ding timi cu lan in SDF hmunpi cu an ra kap a si tiah Colonel cun a simbet.Hi Syria lamtang pawl cun Tank le hriamhrei tumpi pi,Rocket tiang an hman ruangah kanni lam khal in kan kahvenak a si tiah a simbet.

Hivek ih hriamhrei tumpi pi an hman ruangah American cun tlunlam ihsin Vanzam thawn a kap ciamco ih ralkap a zatel rori in an thi ti si.American lam cun hi a zatel ih thitu lakah Russia ralkap an telve tiah an sim ih a dik rori a si ahcun American kahnak ruangah Russia ralkap khal an thive thlang tinak a si.American le Russia cu khat le khat an kahawk ngah lonak dingah nazi 24 sung biakawknak Line hi oncia ringring a si tiah thuthang cun an tarlang.

Tui thil cang mi khal ah American lam cun thaten thuhla an suh hnuah Russia lam ih siannak pek mi vek ih an kah mi a si tiah Pentagon Hmunpi cun an sim.Syria Cozah cun hi ralkap a zatel ih thihnak thuhla ah lungawi loin UN lam ah thuhla heknak a thlen ih Leitlun pi khal in American cun an mawhthluk a mawi a si tiah an ca ahcun an tarlang.