ALBERT EINSTEIN IH THLUAK LE MITMU

0
199

Leitlun scientist ropi Albert Einstein cu 1955 kum April ni 17 ah a thinhnaka na in Princeton sizung ah a cekawter.Cutin a thaisun ah a thinhnaka thihri puar in a thi.Kum 76 ih thitu Einstein thihhnu ah thilmak zet pakhat a thlengcih.Cucu a thluak thatuk an phorhsak mi hi a si.Hivek ih a thluak thatuk cek dingah April ni 18 ah Dr Thomas cu Sizung ah a ra thlengcih.Dr Thomas cun Einstein ih taksa cu a khuaitheh hnuah a thihnak san cu a phuang a si.

Dr Thomas cun Einstein ih thluak cu a phorh ih thaten a tah.Dr Thomas cun Einstein ih thluak cek ding timi a sinan tutiang Einstein ih thluak result cahnah in hmuh ding a um lo cu thilmak a si lala.Dr Thomas cun Einstein ih thluak cu a phorh ih siat thei lo dingin formalin si thawn a ciah.Cun a mit khal a phorhsak ih Einstein ih mit sibawi Henry Adams hnenah a pek.Tukhal ah Einstein ih mitmu cu New york khawpi ih hmunhim pakhat ah thingkuang sungah a umlai ti si.Dr Thomas cun Einstein ih thluak le mitmu a phorh theh hnuah a taksa cu a vuiliam ti a si.

Hiti a thluak le mitmu phorhsak cu Einstein ih duhdan a si lo.Einstein cu a taksa hi mei ah urkang in a vutcam khal zohman ih theihlonak ih thehdarh theh ding kha a duh mi a si.Hiti a thluak le mitmu an phorhsak cu dan khal in a siansak lo mi a si.Dr Thomas cun a phorh mi mitmu le thluak pawl cu thate in cekfelnak an neih hnuah Science cabu ih record tuah dingin Einstein ih fapa Hans Albert hnenah thukamnak a rak tuah mi a si.April ni 20 ih suah mi New York Times cun Dr Thomas cun Einstein fapa ih siannak in tuavek ih thil a tuahnak a si tiah an tarlang.

Dr Thomas cun amai bulpak Office ah Einstein ih thluak cu cawhtawlh pi sungah Princeton Sizung ihsin an dawisuak tiang cu a ret.Dr Thomas cun a hnatuan an dawisuak ihsin Einstein ih thluak cu la in sizung in a suak.Dr Thomas cu Pensilvania University ah feh in mithiam pakhat ih bomnak in Einstein ih thluak cu sem 240 ah an can.Cuti an can mi thluak cu mipi hnenah a pek.A tanglai thluak pawl cun zalung 2 sungah ret in amah in a kilkhawi.Dr Thomas cu 2007 ih a thih hlante ah a kilmi Einstein ih thluak cu Princeton Sizung ah a apsal ta.

Kum 50 lenglo thate ih an kilkhawi mi Einstein ih thluak hmu duhtu cu mipi lakah an tam ciamco.Einstein ih thluak sem tete a cotu mithiam zingzoitu pawl khal cun Prince Sizung le Pensilvania University ah an co mi thluak pawl cu an apsal.Tuah cun Dr Thomas ih candarh mi Einstein ih thluak pawl le Dr Thomas Harvey ih thluak thuhla ngan mi ca pawl cu Philadelphia Mesium pakhat lawngah hmuh ding a um thlang.