2019 Nunau World Cup Ah Ballon dO’r Laksawng Ngahtu Hegerberg A Tel Lo Ding




Franch Football cun avei khatnak si dingin tui kum ah Nunau Ballon dO’r laksawng an rak pe ve ih Norway Nunau bawhlung sit thiam Hegerberg in a rak ngah.Kum 23 mi Hegerberg hi Lyon club ih lek rero lai a si ih buainak hrekkhat ruangah ram hrang bawhlung sit a rak colhsan zo.

Hegerberg in ram hrang bawhlung sit a colhsan thu ah Norway coach Martin Sjogren cun,”Hegerberg hi ram hrang bawhlung sit sal dingin kan ko rero nan, a rakir sal duh lo ih a tel loin 2019 Nunau World cup kan lek a tul ding.Curuangah anih theihhngilh in player dang pawl cu tha zetih kaihruai ding cu ka zuamsawn mi a si,” a ti.

Nunau Ballon dO’r laksawng la hmaisabiktu Hegerberg in ram hrang bawhlung sit a colhsannak san cu Norway ram in Nunau bawhlung sit thiam pawl a zoh that lo tuk ruangah a si ih 2017 Women Euro Cup theh in Ram hrang bawhlung sit a rak colhsan zo a si.