1-1 In Ajax Le Juventus An Duhtawk Aw




Champions league quarter final puai hmaisa sawn hrang Netherland club Ajax in Juventus an rak mikhual ih goal 1 veve thun aw in an duhtawk aw.

Ajax XI (4-2-3-1) :Onana, Veltman ,De Ligt ,Blind ,Tagliofico ,Beek ,De Jong ,Ziyech ,Schone ,Neres ,Tadic.

Juventus XI (4-3-3 ) : Szczesny ,Sandro ,Bonucci ,Rugani ,Cancelo ,Matuidi, Pjanic ,Bentancur, Ronaldo ,Mandzukic ,Bernardeschi. Thelhbawh : Perin ,Dybala ,Costa ,Khedira ,Kean,Sciglio.

FT: Ajax 1-1 Juventus
Nerez 46, C.Ronaldo 45′

Puai an thok cu Inntek Ajax in an nawr hmaisa sawn ih rang zetin an cangvai.minute 18nak ah nawrsawntu Inntek hrang Ziyech in khawlsut thazet a nei nan,Juventus kawlkil in a rak khamsak.Juventus in an nawr caan khalah tihnung an nei thei hrih lo ih Ajax sawn an lek thazet hrih.Ajax in an nawr hrih bangin minute 25nak ah laitlan De Beek in nai zetin khawl a thelh.Juventus in an nawr ve thlangih corner an sitmi cu C.Ronaldo in bauhthan thawn a rak sit nan,kawl a thelh hnu ah Bentancur khal in khawl a thelh ve.Duhtawk aw zetin an nawr aw thlangih Ajax hrang Ziyech in remcang thazet a hlah ih Juventus hrang Bernerdesch in khawl a thelh ve.Mikhual sawn in an nawr peh bangin minute 45nak ah Cancelo Bawhlung tuahmi cu C.Ronaldo in Juventus hrang a sawh goal ih colh an hmang.

Caan hrek neta sawn an thok cu mikhual Juventus ralrin man hlanah inntek hrang Nerez in Bawhlung a tlanpi zurzo ih a sit goal.Inntek in an nawr peh bangin Nerez in a sit goal nan,off side ruangah hnon a si.Mikhual in an nawr ve cu penalty an beisei nan,VAR kiltu pawl suh an si hnu ah referee in fawl a la lo.Inntek in nasa zetin an nawr ih khawl an sut puppo rero nan,an sit goal thei lo.Inntek in nasa zetih an nawr hnu ah mikhual in an nawr thutthi ve cu Costa in Bawhlung a tlanpi zurzo ih khawl a sut cu khawlban a ngah.Mikhual an tihnung um thei nawn lo ih Inntek khal in nawr zet cingin an sit goal bet thei lo tikah 1-1 thawn caan a cem.

April ni 17 ah avei 2nak hrang an do aw sal dingih an result komkhawm ding a si.Cuti ih goal nei tam lole away goal nei tam sawntu cu semi final an lut ding.Tui dinhmun ah mai innpi ih lek ding Juventus rin a sisawn nan,Ajax hrang beisei tumpi a umlai ve a si.